Bodo Ramelow

dr Bodo Ramelow (2019)

Dr Bodo Ramelow (* 16. Februar 1956 z Osterholz-Scharmbeck, Nidersachse) isch e dytsche Bolitiker (Linki) un isch syt em 4. Merz 2020 Minischterbresidänt vum Land Diringe. Des Amt het er au sco vum 5. Dezämber 2014 bis zum 5. Februar 2020 ghaa.

Vu 2009 bis 2014 isch er, wie scho vu 2001 bis 2005, Fraktionsvorsitzer vu syre Bartei im Diringer Landdag un dodermit Oppositionsfierer gsii. Vu 2005 bis 2009 isch er Mitglid vum Bundesdag gsii.

Uusbildig un Beruef

Dr Bodo Ramelow isch z Rhyhesse in eme evangelischen Elterehuus mit drei Gschwischtrig ufgwachse un het anne 1971 dr Hauptschuelabschluss gmacht. Sy Vater Erwin Ramelow, wu vu Kricheldorf bi Salzwedel gstammt isch, isch an dr Folge vun ere Chriegsverletzig gstorbe, wu dr Bodo elf gsii isch, sy Mueter isch e ellaierziehendi Huuswirtschaftslaiteri gsii. Z Gießen het er vu 1971 bis 1974 bi Karstadt Chaufmann im Ainzelhandel, Fachuusbildig Wild un Gfligel glehrt.

An dr Chaufmännische Schuele Marburg het dr Ramelow anne 1975 di Mittler Ryfi un 1977 di chaufmännisch Fachhochschuelryfi gmacht. Ab 1977 het er as Substitut zur Yyarbaitig bi dr Karstadt AG un bim friejere Chaufmärt HaWeGe z Marburg-Cappel gschafft. Speter isch dr Ramelow Filiallaiter bi dr Jöckel Vertriebs GmbH Marburg wore. E Briefig zum IHK-Uusbilder (AdA-Schyy) het er Ändi 1970er Johr abglait Vu 1981 bis 1990 isch dr Ramelow Gwerkschaftssekretär z Mittelhesse gsii, vu 1990 bis 1999 Landesvorsitzer vu dr Gwerkschaft HBV z Diringe un vu 1992 bis 1999 Ufsichtsrotsvorsitzer vu dr Wohnigsgnosseschaft Zukunft z Erfurt.

Dr Ramelow isch syt Novämber 2006 in dritter Eh mit dr Italieneri Germana Alberti vom Hofe ghyrote, ere Supervisori, wu unter anderem as Organisationsentwickleri bi dr Rosa-Luxemburg-Stiftig schafft. Är het zwee großi Sih us erschter Eh.

Bolitischi Laufbahn

Ufstig in dr Diringer Landesbolitik syt 1994

Am Dag vu dr Arbet 1994 isch dr Bodo Ramelow näb em Gregor Gysi, em Gerhard Jüttemann, dr Gabi Zimmer un em Heinrich Fink uf dr zäntrale Maifyyr vu dr PDS z Erfurt as Redner ufdrätte. Im Jänner 1997 het er zue dr Initiatoren un Erschtunterzaichner vu dr Erfurter Erklerig ghert, eme Ufruef vu rund 40 Chinschtler, Intellektuälle, Gwerkschafter un Bolitiker fir meh soziali Grächtigkait un e Bolitikwächsel dur en ängeri Zämmearbet vu SPD, Grienen un PDS.

Diringer Landdagswahl 1999

Anne 1999 het dr Ramelow, wu im April 1999 in d PDS yydrätten isch, uf dr Landeslischt vu dr Bartei fir d Diringer Landdagswahl 1999 uf Blatz zwai no dr ehmolige Landesvorsitzeri Gabi Zimmer kandidiert. Är isch derno zum erschte Mol in dr Diringer Landdag gwehlt wore, wun er vu 1999 bis 2001 stellverdrättende PDS-Fraktionsvorsitzer gsi isch un schließlig am 14. Novämber 2001 zum Vorsitzer vu dr Landdagsfraktion gwehlt woren isch. Um die Zyt isch er schärzhaft „Ai-Mann-Opposition“ gnännt wore. Anne 2002 isch er derzue Mitglid im Byrot vu dr Thüringer Aufbaubank (TAB) wore.

Diringer Landdagswahl 2004

Am 20./21. Septämber 2003 het d Diringer PDS z Lobenstein mit em Bodo Ramelow zum erschte Mol en aigene Kandidat fir s Amt vum Diringer Minischterbresidänt nominiert. Am 7. Februar 2004 het e sy Bartei uf Blatz ais vu dr Landeslischt fir d Landdagswahl gsetzt. Bi dr Landdagswahl am 13. Juni 2004 isch d PDS mit 26,1 % vu dr Stimme uf ihre bis dert bescht Ergebnis z Diringe chuu, dr Ramelow het im Wahlchrais Erfurt I e Diräktmandat gwunne. S Wahlziel, dr Meehait vu dr CDU en Änd z mache, het er aber nit gschafft. Dr Ramerlow isch derno wider zum Vorsitzer vu dr PDS-Landdagsfraktion gwehlt wore.

Bundesbolitik 2005 bis 2009

Am 13. Dezämber 2004 isch dr Bodo Ramelow zum Wahlkampflaiter vu dr PDS fir d Bundesdagswahl 2005 bstimmt wore. Ab Juni 2005 isch er Verhandligsfierer vu dr PDS bi dr Gspräch zue dr Fusion mit dr WASG gsii.

Bundesdagswahl 2005

Dr Ramelow het am 18. Septämber 2005 e Mandat fir dr 16. Dytsch Bundesdag uf dr Landeslischt vu dr Diringer Linksbartei gwunne. S Diräktmandet im Bundesdagswahlchrais Gera – Jena – Saale-Holzland-Chrais het er mit 29,4 % gege dr Volker Blumentritt vu dr SPD (31,8 %) verfählt. Am 30. Septämber 2005 isch dr Ramelow zum stellverdrättende Fraktionsvorsitzer ohni Fachberaich gwehlt wore. Är isch au „Religionsbeufdraite“ vu syte Fraktion gsii. No syre Wahl in dr Bundesdag isch er zum 17. Oktober 2005 us em Diringer Landdag uusgschide. Sy Noofolger as PDS-Fraktionsvorsitzer sch dert dr Dieter Hausold wore. Im Mai 2008 het dr Bodo Ramelow s Amt vum Wahlkampflaiter vu dr Linken abgee un isch Federalismusbeufdraite vum Bundesvorstand vu syre Bartei wore, wun er syter 2004 aaghert.

Diringer Landdagswahl 2009

Am 2. Dezämber 2007 isch dr Ramelow bim Landesbarteidag vu dr Diringer Linken aistimmig as Spitzekandidat fir d Landdagswahl 2009 nominier twore. Bi dr Landdagswahl am 30. Augschte het sy Bartei gegeniber 2004 1,3 Brozäntpinkt mee iberchuu, isch aber unter dr 30-Brozänt-Marke blibe. Dr Ramelow sälber het s Diräktmandat im Wahlchrais Erfurt III gwunne. No dr Wahl het er dr SPD e Koalition vorgschlaa mit ihm as Minischterbresidänt. D SPD het des aber abglähnt, au wun er vorgschlaa het, ass är sälber uf s Amt verzichte diei. D SPD het derno aber ne Koalition mit dr CDU untet dr Christine Lieberknecht bildet.

Minischterbresidänt vu Diringe

Bi dr Landdagswahl z Diringe 2014 het dr Ramelow as Spitzekandidat vu dr Linke sy Diräktmandat im Wahlchrais III an d Marion Walsmann (CDU) verlore un isch iber dr erscht Blatz uf dr Landeslischt vu syre Bartei in dr Diringer Landdag yyzoge. No Sondierigsgspräch mit dr CDU un mit dr Linke het d SPD bschlosse, ass si zämme mit dr Griene un dr Linke ne Koalition unter eme Minischterbresidänt Ramelow bilde wänn. Am 5. Dezämber 2014 isch dr Bodo Ramelow im Diringer Landdag bi dr Wahl vum Minischterbresidänt im zweete Wahlgang ni netig absolut Meehait mit 46 vu 91 Stimmen iberchuu. Är isch dodermit dr erscht Minischterbresidänt in dr Gschicht vu dr Bundesrepublik gsii, wu d Bartei Die Linke gstellt het.

Syt em 26. Novämber 2019, wu si dr nei Landdag konschtituiert het, isch dr Ramelow, nume no gschäftfierend im Amt gsii. Am 5. Februar 2020 isch dr FDP-Bolitiker Thomas Kemmerich zue sym Noofolger gweelt wore. Wel dää au mit dr Stimme vu dr AfD ins Amt gwehlt wooren un des as Dammbruch un as aktivi Kooperazioon mit Räächtsextreeme yygschetzt wooren isch, het des fir bundeswyt Ufsää gsorgt un em Kemmerich massivi Kritik broocht. Är isch derno am 8. Februar zrugdrätte un isch syterhär nume no gschäftfierend im Amt sii. Am 4. Merz isch dr dr Bodo Ramelow im dritte Wahlgang gwehlt wore.

Uuszaichnige

• Abraham-Geiger-Plakette vum Abraham-Geiger-Kolleg an dr Universitet Potsdam (2013)

Schrifte

• Bodo Ramelow u. a. (Hrsg.): It’s the Internet, stupid!: die Linken und die „Schienennetze“ des 21. Jahrhunderts. VSA-Verlag, Hamburg 2011, ISBN 978-3-89965-470-7.
• Bodo Ramelow (Hrsg.): Made in Thüringen?: Nazi-Terror und Verfassungsschutz-Skandal. VSA-Verlag, Hamburg 2012, ISBN 978-3-89965-521-6.
• Bodo Ramelow (Hrsg.): Schreddern, Spitzeln, Staatsversagen: wie rechter Terror, Behördenkumpanei und Rassismus aus der Mitte zusammengehen. VSA-Verlag, Hamburg 2013, ISBN 978-3-89965-550-6.

Literatur

• Hans-Dieter Schütt: Gläubig und Genosse. Gespräche mit Bodo Ramelow. Karl-Dietz Verlag, Berlin 2006, ISBN 3-320-02074-9.
• Robert Lorenz: Techniker der „kalten Fusion“. Das Führungspersonal der Linkspartei. In: Tim Spier u. a. (Hrsg.): Die Linkspartei. Zeitgemäße Idee oder Bündnis ohne Zukunft? VS Verlag für Sozialwissenschaften, Wiesbaden 2007, ISBN 978-3-531-14941-7, S. 275-323.
• Stefan Wogawa: Die Akte Ramelow: Ein Abgeordneter im Visier der Geheimdienste. Karl-Dietz-Verlag, Berlin 2007, ISBN 978-3-320-02126-9.
• Stefan Wogawa: Ein gewisser Herr Ramelow: Der Akte zweiter Teil. Eckhaus Verlag, Weimar 2014; ISBN 978-3-945294-03-1.

Weblink

 Commons: Bodo Ramelow – Sammlig vo Multimediadateie

• Homepage
• Biographie beim Deutschen Bundestag
• Abgeordnetenseite beim Thüringer Landtag (Site cha nüme abgrüeft wärde; Suche im Webarchiv)[1] [2] Vorlage:Toter Link/www.thueringer-landtag.de
• Heribert Prantl: Verfassungsschutz darf Linke beobachten – Nicht nur rechtswidrig, sondern dumm, Süddeutsche Zeitung, 22. Juli 2010

Fueßnote

Dä Artikel basiert uff ere fräie Übersetzig vu dere Version vum Artikel „Bodo_Ramelow“ vu de dütsche Wikipedia. E Liste vu de Autore un Versione isch do z finde.